Lam 5 | NdeIBE | STEP | Khumbula, hawu Jehova, ukuthi kwenzakaleni kithi; khangela ubone ukuyangeka kwethu.

Lamentations 5

1 Khumbula, hawu Jehova, ukuthi kwenzakaleni kithi; khangela ubone ukuyangeka kwethu.

2 Ilifa lethu seliphiwe abezizweni, imizi yathathwa ngabemzini.

3 Sesiyizintandanane ezingelaboyise, omama sebenjengabafelokazi.

4 Amanzi okunatha siyawathenga; inkuni zethu zikhutshelwa imali.

5 Labo abasixotshayo basihlezi ezithendeni; sikhathele asilakuphumula.

6 Sazinikela kwabeGibhithe labe-Asiriya ukuze sizuze isinkwa.

7 Okhokho benza isono kodwa kabasekho, thina yithi esesijeziswa.

8 Sibuswa yizigqili, kakho osikhululayo ezandleni zazo.

9 Isinkwa sisithola ngendlela elengozi ngenxa yenkemba ekhona enkangala.

10 Isikhumba sethu sitshisa njengeziko, silomkhuhlane wendlala.

11 Kwaba lokudlova abesifazana eZiyoni kanye lezintombi ezimsulwa emadolobheni akoJuda.

12 Amakhosi alengisiwe ngezandla zawo; abadala abasahlonitshwa.

13 Izinsizwa ziyahoqiswa ematsheni okuchola; abafana babhensiswa yimithwalo yezinkuni.

14 Abadala sebesukile esangweni lomuzi; izinsizwa sezithule ukuhlabelela.

15 Akusekho ukuthokoza ezinhliziyweni zethu; ukugida kwethu sekuphenduke ukukhala.

16 Umqhele usuwile ekhanda lethu. Maye thina, ngoba sonile!

17 Ngenxa yalokhu izinhliziyo zethu zibuthakathaka; ngenxa yalezizinto amehlo ethu ayafiphala

18 ngoba intaba iZiyoni silugwadule, sekucathama amakhanka kuyo.

19 Wena, O Jehova, busa nini lanini; ubukhosi bakho buhlezi ezizukulwaneni lezizukulwaneni.

20 Kungani uhlezi usikhohlwa? Usifulathelelani isikhathi eside kangaka na?

21 Sibuyisele kuwe, O Jehova, ukuze sibuyele; buyisa kabutsha izinsuku zethu njengezakudala,

22 ngaphandle kokuba nxa ususilahlile kokuphela wasizondela ngokungalinganiswe.